藝人工作一向好被動，永遠唔知幾時會受觀眾歡迎，攀上事業高峰，幾時一瞬間就去咗谷底，忽然喺娛圈銷聲匿跡，好似講得一口半鹹不淡廣東話嘅金剛(原名李信樵)咁!!

金剛之前喺「獎門人」系列中，成日講啲唔好笑嘅故仔，令觀眾印象深刻，點知佢同小儀拍完《街坊廚神》後，成個人就喺「公仔箱」消失咗咁，一直有傳志偉與余詠珊不和，搞到金剛「被消失」(新聞連結： http://bit.ly/2xKMBnS )。

金剛今日凌晨貼出同曾志偉嘅合照，留言：「好久不見，恩師！」胡蓓蔚亦喺Ig擺佢同金剛嘅相，二人老友鬼鬼，之前胡蓓蔚打卡話喺澳門一間酒店，未知係唔係一齊出騷登台。

金剛於2007年毅然由台灣嚟港發展，金剛由TVB8轉到收費台拍劇，更獲曾志偉賞識做《獎門人》主持，今年6月，金剛決定離開無綫往外闖。

身為「志偉派」嘅金剛早前直言當時喺無綫嘅工作量突然少咗好多，曾經試過一年只接到一個騷，整個月冇工開(新聞連結： http://bit.ly/2yG6nz1 )，佢覺得「內部鬥爭唔關我事，我小朋友，點知乜事嗌交啫？你叫我做就做」，又話「我走前半年有個《街坊廚神》，唔知係咪為咗留我喇，但我做咗獎門人（曾志偉）都冇嬲我。總之我當佢係師父，冇佢就冇香港嘅金剛，對我有恩，無論做乜都撐佢」，目前金剛已經簽咗俾王祖藍，做旗下藝人，主力返大陸發展。