當年今日
關於我們

【傅明憲甩拖坐客貨車】單身莊家彬笑晒現身:Sorry呀…

蘋果日報 2015/04/16 06:00

蘋果傅明憲客貨車分手即時高血壓練馬師憔悴look爆大冷W莊家彬莊家憔悴經濟封鎖莊紹綏

日前傅明憲坐住架客貨車,難掩疲態單拖到跑馬地馬會出席曾志偉62歲生日派對(連結: http://bit.ly/1yxVYUf ),令人嘖嘖稱奇,亦不禁令人猜想,44歲嘅傅明憲同細佢11年嘅莊氏集團太子爺莊家彬9年情玩完之後,情歸何處。而自從3月初爆出分手後,傅明憲亦未有再更新微博。

之前有報道話,兩人拍拖多年感情已轉淡,亦有傳係因為男方已另結新歡,認識台灣一名音樂人,而傅明憲又喺呢個時候想要一個名份,timing錯晒,結果男方更主動向傅明憲提出分手。另亦有傳指莊家彬父親、莊士集團主席莊紹綏唔鍾意傅明憲,故用經濟封鎖同大時大節迫莊家彬返屋企報到交人兩招,迫莊家彬同傅明憲斬纜。

今晚莊家彬單拖到中環四季酒店出席卡地亞高級珠寶展,依舊官仔骨骨冇走樣,並大方停低任影,但當傳媒問及是同傅明憲分手、以及家人是否作經濟封鎖時,佢就耍手擰頭行開咗,轉頭再應傳媒要求現身補相,但對於種種提問,佢就笑笑話:「Sorry呀唔好意思。」