當年今日
關於我們

【困難重重】演藝人協會想搞認受性頒獎禮 張敬軒:重視表彰幕後人

蘋果日報 2019/01/02 12:08

張敬軒叱咤頒獎禮2018

張敬軒噚晚喺商台「叱咤樂壇頒獎禮」中拎咗叱咤男歌手金獎等3個獎,成為全晚大贏家,連埋之前新城「勁爆樂壇頒獎禮」同港台「十大中文金曲頒獎禮」,軒仔暫時9獎在手,佢話:「好意頭,長長久久,希望長攞長有,今年好開心,做咗好多嘢,好多嘗試,拉闊咗自己事業。我想做網紅,開YouTube Channel,我希望請歌手嚟屋企唱歌。」問到會唔會請古天樂?軒仔話:「希望請得佢郁,今晚surprise佢嚟,我有收風,聽聞佢電影忙,行唔開。」
軒仔係演藝人協會副會長,佢話:「古仔擔任會長,佢用咗自己資源,做咗好多嘢,今晚呢個獎,對佢嚟講特別有意義,係一個對佢貢獻嘅表揚,我知佢冇出唱片好多年。古仔做呢個會長,都集合晒我哋呢代歌手去開會傾,計劃做一個頒獎禮,係一個可持續發展嘅頒獎禮,獨立唱片公司都計埋。o依家初步,明白困難重重,傾咗五、六次,佢好有耐性,佢等我哋傾。開頭先搞音樂會,協會角度唔係focus喺我哋呢班歌手,好多新人,需要多啲資金,做一個認受性頒獎禮,加埋古生做電影,佢好重視表彰幕後人,如錄音、混音,好少歌手會提到佢哋。」
軒仔話古仔噚晚出現,有德高望重感覺,軒仔話:「前輩級演藝人,古生對我哋好好,佢會諗埋醫療保障,佢係我哋榜樣,演藝人協會3月會搞籌款活動,希望多啲廠商、有心人會幫到我哋,我哋自發性令基金運作好啲,十年十年咁過去,唔止好多拎獎演藝人,好多都已退休,想對佢哋有保障。」
精選娛聞,喺晒《娛果》
http://fb.com/appledailyent