當年今日
關於我們
中環在線:稅貸天后鍾意扒龍舟 - 李華華
蘋果日報 2007/10/10 00:00
咪睇銀行界個個行出嚟都官仔骨骨、斯斯文文,其實當中卧虎藏龍,唔少都係運動健將。好似有「稅貸天后」美譽嘅永亨信用財務總經理吳幗欣咁,外表嬌滴滴,查實鬼咁好動,玩嘅仲係非一般運動扒龍舟。冇錯,係端午節扒嘅龍舟。
冇麒麟臂有鴛鴦手
無啦啦點解走去扒龍舟,唔怕變「麒麟臂」咩?吳幗欣話,佢有朋友扒開,所以叫埋佢一齊玩,點知一扒就扒咗三年幾,仲變咗發燒友,除咗每年香港賽龍舟,仲周不時成隊人出外作賽,通常都係賽幾百米,最長都係廣州賽700米。因為佢主力扒一邊,鴛鴦手就在所難免。
佢仲同華華講,扒龍舟唔使好多錢,每年大約600至700蚊,主要都係租船,其他裝備就係對手套,用嚟保護雙手,唔戴住對手套,隨時整損手。
家吓佢一年扒5個月,通常由3月開始操,每星期練1次,地點多數係西貢。