《導火新聞線》收視回升，戲肉亦陸續出場。之前一集講到方凝(周家怡飾)鬧爆皇阿媽(梁小冰飾)報道其男友兼區議員石俊賢(李忠希飾)患上愛滋病，結果男方自殺身亡。方凝指摘皇阿媽當年係因為不甘被石拒愛、故借報道報仇；皇阿媽反指方凝因為石患愛滋而不敢與之接近，令石難受，故才自殺亡。兩女針鋒相對，劇力萬鈞。

到底係邊個害死石俊賢？如果咁容易估到仲邊度有戲做。不過，梁小冰今日接受《蘋果》電話訪問時，就自爆下周有精采場面，佢話﹕「皇阿媽係奸角，下周大家就可以見到佢點仆街。佢為咗新聞連自己老公、女同孫都出賣，阿囡美棋因為咁自殺，阿皇媽就畀前夫石修摑咗一把，好痛呀，好彩一Take過。」

此外呢，火速上位嘅周家怡今日馬不停蹄受訪，先與梁健平喺灣仔接受吳綺莉電台節目訪問，之後又到本報接受《壹錘定音》訪問。對收視回升，家怡話﹕「都係一支強心針，令大家士氣都好啲。我覺得之後嘅收視會逐步提升，希望多啲人鍾意啦。」

家怡透露方凝會有出人意表嘅結局，佢話﹕「唔可以講太多，但嚟緊我同姜文杰會有一場梳化激情戲，唔知係咪我唔夠吸引呢？永遠去到我個胸佢就避開，佢第一次拍有啲尷尬。」