【好地地又走】6月30約滿離開PSG 伊卡迪又受麻煩老婆擺佈？
蘋果日報 2020/04/04 10:00
國際米蘭巴黎聖日耳門法甲莫路伊卡迪娜拉
娜拉已向PSG表示季後伊卡迪將不會留隊。
上季同國際米蘭鬧翻咗嘅阿根廷射手莫路伊卡迪，季前轉會窗最後一刻就借咗去法甲巴黎聖日耳門（PSG）。而喺PSG伊卡迪嘅表現都相當唔錯，更有指PSG完季之後會正式買斷佢。不過近期就有新聞傳出，指伊卡迪借用期滿之後就會返國際唔會留低，而呢個出人意表嘅決定，原來有關佢個麻煩老婆娜拉事？
話說今季伊卡迪去到PSG，把握住卡雲尼受傷嘅機會擔正之下，停擺前各項賽事踢咗31場已經入咗20球，完全係重獲新生。亦都有消息傳出，PSG已經準備好季尾以7,000萬歐元買斷佢。一切都看似好好之下，米蘭體育報有記者就爆料，話伊卡迪嘅老婆兼經理人娜拉已經通知PSG總監李安納度，指伊卡迪無意欲留低，6月30日借約期滿就會回歸國際，據指都令到PSG一方好唔滿意。
不過重返國際米蘭呢著對伊卡迪好唔好真係好難講，教練干地就一早講明唔會用佢，而一直心儀伊卡迪的祖雲達斯已經因武漢肺炎疫情收入大減，更要求球員減薪，季後會唔會出高價買人都係未知數，家下都只能祝伊卡迪佢好運。