ViuTV節目《入住請敲門》喺舊年推出咗第一輯，雖然佢起用新人莫竣名同林婷，播出之後坊間嘅反應都好好，結果ViuTV添食，喺呢個月推出第二輯，今次主打泰國同馬來西亞呢啲地方，迴響比之前更加大。

林婷和莫竣名日前在銅鑼灣接受訪問，莫竣名一坐低就即笑住話林婷係咪食咗藥，猛問佢係咪唔驚，抑或係驚到冇表情，搞到林婷冇咁好氣話：「咁唔多唔少係一定會驚，不過今次係換咗個方式，冷靜地驚，今季主要多啲靈探點，多咗啲遊戲，成件事豐富啲。」

其實喺電視畫面，周不時見到有一隻紅色眼嘅icon出現，話俾觀眾聽邊個位置出現靈體，佢哋話：「我哋有一個幕後本身睇到，所以剪片嘅時候專登俾佢睇，等佢再話俾大家知邊度有。」不過最令佢哋覺得安心嘅地方，原來仲有一個師父：「佢唔想出鏡，但係佢有時會同我哋一齊拍，睇吓嗰個地方適唔適合。」莫竣名話：「佢有時話俾我哋知啲靈體有法力，不過之後會叫我哋繼續拍，好似有一次我去咗醫院拍嘢，師父喺門口set咗個壇，埋位之前同我哋唸經，篤吓個額頭，跟住會同其他人外面等，變咗我哋個人安心好多，佢都有俾度符我，不過拍拍吓唔知放咗去邊。」

講到有冇見到怪事，林婷先話：「咁又冇真係見到，最多只係聽到有音樂，好似其中有一集，不過冇出到街，去咗吉隆坡一間酒店，半夜聽到有啲音樂，我咪即刻WhatsApp隔籬房嘅導演，問佢係咪播歌，點知佢哋話冇，之後行咗走出間房，係冇音樂聲，我間房嘅另一係後樓梯，啲窗又係密封，真係唔知邊度嚟。」

林婷之後喺另一集去咗一間祖屋拍攝，其間亦有啲怪事：「嗰間祖屋10幾層，成間屋留低咗好多嘢，師父話間屋係有法力嘅鬼，我哋最多只係去到頭嗰幾層拍，結果我哋真係拍咗4層，之後上唔到去，而且全程我個頭都勁痛，好唔舒服！」

莫竣名就話：「除咗喺第一集讀聖經嘅時候，聽到有笑聲之外，仲有另一集我哋喺芭堤雅拍，係上年發生過藏屍案，廁所個水喉好似俾人撳住咁長開，搞到濕晒，當時廁所係冇人，真係好得人驚！我嗰晚仲被鬼壓，瞓得好差。」佢補充話：「其實一直我都對呢方面半信半疑，而且聽到啲師傅講得好實在，所以先敢去，想親身睇吓係咪可以聽到、睇到，想感受見到嘅人睇到會點。」

採訪：何慧斯
化妝：@Scarlettymakeup（莫竣名）
服裝：Beams @ ithk（林婷）、@theholymtm（莫竣名）
場地提供：HMV Kafé

精選娛聞，喺晒《娛果》
http://fb.com/appledailyent