李八方online︱立法會作反？「煲底」外倒掛國旗 秘書處致歉並調查
蘋果日報 2020/12/10 13:57
李八方online立法會國旗
社交網站Facebook專頁「香港膠液所」今早發文，話今早9點15分，喺俗稱「煲底」嘅立法會示威區對出升旗位置，驚見國旗倒轉情況。
反嘞反嘞，無咗民主派嘅立法會，膽大包天作反？社交網站Facebook專頁「香港膠液所」今早發文，話今早9點15分，喺俗稱「煲底」嘅立法會示威區對出升旗位置，驚見國旗倒轉情況，事隔近40分鐘，有職員喺9點54分重新掛啱後再升旗。
根據立法會網站資料，立法會秘書處職員每日上午，都會喺立法會廣場進行國旗同特區區旗嘅升旗儀式。根據「香港膠液所」嘅帖文截圖，可見立法會廣場旗桿嘅國旗掛反，版主其後再上載一段影片，片中可見有兩名職員正在重新升國旗。「香港膠液所」特別喺帖文標籤，「陳姑娘口罩倒轉香港將國旗倒轉」、「蟲泰有冇補充」，揶揄日前食衞局長陳肇始抗疫近一年仲戴錯口罩，以及熱血公民立法會議員鄭松泰2016年喺立法會會議廳倒插國旗事件。
網上截圖
其實全國人大常委會啱啱先喺今年10月，表決通過關於修改《國旗法》、《國徽法》嘅決定，2021年1月1日起實施，修法規定不得倒掛、倒插或以其他有損國旗尊嚴嘅方式升掛、使用國旗，亦不得隨意丟棄國旗。特區政府都會對《國旗及國徽條例》作出適當修訂，以實施適用於香港的規定。
八方正就倒掛國旗事件向立法會秘書處查詢。立法會秘書處回覆話呀，秘書處今早知悉立法會廣場嘅國旗倒掛後，已立即喺9時54分糾正，秘書處為此鄭重致歉，並正深入調查有關事件，會按照內部人事管理機制嚴肅跟進，亦即時檢視及改善升旗程序，確保同類事情不再發生。
一度倒掛國旗嘅煲底，喺立會職員急急「補鑊」後已經回復正常。本報記者攝
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！