年輕人，到底係乜嘢驅使你星期日天濛光起身跑樓梯啊？係愛定競爭啊？答案可能係愛、競爭，仲有慈善啊！今日係新地主辦嘅第七屆公益垂直跑，郭炳江囝囝郭基煇（Adam）同郭炳聯囝囝郭基泓（Christopher）兩位新地第三代掌舵人，首度合作一齊跑企業組隊際賽。

近年喺公司業務陸續「入局」嘅Adam同Christopher，今年連慈善活動都走到最前線，由以往參加82層體驗賽，轉戰企業組接力賽。至於因乜咁落力？Christopher 話主辦咗咁今年，係時候落場，Adam則指話晒跑企業組，企業間鬥爭心情都投射埋落嚟，所以份外上心。佢哋呢隊最終82層只係跑咗15分19秒，分分鐘快過八方落樓梯，得第6名。

外界一路都好關注Christopher同Adam嘅關係，競爭嘅心會唔會都存在喺隊友之間呢？今次呢對堂兄弟「首度合作」，就分別負責跑最重要嘅頭尾兩棒，起跑要靚衝線要型，唔容易㗎！

不嬲有做開運動嘅佢哋都異口同聲話，今次最辛苦係精神壓力，唔通真係暗地兄弟間比較造成？唔係，佢哋話係隊際賽嘛，講合作精神，「唔可以拖累隊友！」兩兄弟合作管理咁大間公司，梗係唔可以做對方豬隊友，旗下咁多位員工就最放心啦！

難得兩位新地王國未來主人翁身體力行「運動行善」，難怪今年垂直跑破紀錄吸引咗1,900人參與，計埋新地額外兩蚊配一蚊嘅捐款，總共籌咗600萬元，佢哋希望明年可以突破2,000人參加賽事喎。