貝湯美禮拜日憑「八心之煌」及「威爾頓」起孖兼捧女皇盃，打響重臨客串頭炮。今晚佢轉戰谷草，頭場即贏「明珠一號」，手風順係唔同啲。「明珠一號」馬主胡啟初養馬多年，以往曾以合夥馬「大成就」於02年10月及03年12月兩勝谷戰。「明珠一號」上仗仲用緊潘頓跑緊四班賽，輸近十個馬位，賽後由45分減至40分，評磅員送大禮，令佢今次落到五班跑，結果質新馬換貝湯美，半條直路如飛殺上冚贏雷神大熱門「穩佔先機」爆冷開齋，帶挈胡啟初近十年內首次揚威谷草。連埋同主之「海嵐一號」季初贏田草在內，呢位資深馬主名下現役兩駒今季先後交代咗，亦令葉楚航如釋重負。
葉楚航賽後直言今場用貝湯美贏馬，有啲無心插柳、柳成蔭。佢話「明珠一號」上仗跑泥地，自己賽前有一定信心，惟馬兒騎落冇料到，賽後潘頓做「顧問」，提議初跑谷草一哩一試，但因潘頓應承騎「比你高」在先，遂找騎功唔曳之貝湯美代勞，結果「明珠一號」留放合度加上班次有利，打開勝門。