年屆43歲嘅周海媚（海味）近年轉戰內地發展，邊個話女人嘅愛情會受年紀所限，海味嘅愛情經歷就係最佳嘅例子。佢去到內地發展後，識咗個細自己七年嘅建築師男朋友，簡直不愁寂寞，但佢就話無意結婚，前日周海媚喺北京接受訪問，甜絲絲講男友。

男友求婚十次

周海媚同男友拍拖七年原來早有共識，佢話：「男友常向我求婚，至少十次，鑽戒很早就送了，但我總覺得談戀愛的感覺比較好，結婚是遲早的事，現在還不想。」唔通海味唔驚做高齡產婦，唔想有BB咩？不過佢話：「我們有兩隻狗。」不過似乎佢對呢段姊弟戀好有把握，仲好鬼甜咁話：「愛情會讓人變美。」提到兩人相識嘅經過，周海媚話當年係經朋友介紹喺的士高認識男友，佢仲曾經擔心過年紀問題話：「擔心年齡差距太大，想不到感情格外穩定，他有才華又成熟，很貼心。」周海媚仲話覺得自己唔適合做黃臉婆，同男朋友拍拖初期，兩個都係過住遊山玩水嘅生活，到發展穩定後，佢就話要接工作才感到安樂喎！
近排因為呂良偉出書，揭當年同佢及鄺美雲嘅婚姻搞到滿城風雨，當年海味同呂良偉就因為性格不合喺1989年分開，當時發現佢哋並冇註冊，所以婚姻無效，周海媚冇介意對方翻舊賬賺錢，反而平常心咁話：「不會恨任何人，畢竟曾經深愛過。」