隔牆有耳：報道警隊高層僭建
《蘋果》奪金堯如大獎（李八方）
黨媒日夜講要取締《蘋果》，又話要立法規管新聞行業，一場暴風雨睇嚟無可避免殺到新聞界。面對呢股政治低氣壓，做好新聞呢件事，顯得更加可貴。金堯如新聞自由獎噚日公佈得獎名單，肯定一班新聞工作者嘅專業精神，除咗港台《鏗鏘集》導演憑《7.21誰主真相》勇奪「電台電視組」大獎，《蘋果》調查組亦憑「警隊僭建系列報道」獲得「紙媒網媒組」大獎，八方喺度向同事同行家們講聲恭喜。
「警隊僭建系列報道」詳盡揭發警隊高層如何僭建住宅，包括現職西九龍總區指揮官嘅陶輝、新界北總區高級警司韋華高、水警總區指揮官嘅莊定賢等警隊高層，同事以查冊為起點，再實地考察求證，再給予當事人充份機會回應。
評審之一恒生大學傳播學院教授李少南話，以事實為根據進行深入調查報道，係評審新聞自由獎參賽作品嘅一項重要標準。佢讚揚《蘋果》嘅系列報道「不畏強權地曝光不當行為，可促進社會進步，對社會具有進步意義」，最終喺46份參賽作品中獨佔鰲頭奪得大獎。當政權時刻都話蘋果「假新聞」，獲頒呢個新聞獎，就係對同事最大肯定。願所有新聞工作者，縱然身處極壞時代，仍能用新聞報道，將事實一筆一筆還原。