回歸20周年，對港人嚟講，除咗見到有啲人真話唔敢講，北上藝人講一啲愛國嘅言論之外，仲有啲咩喺香港娛圈見到，自2003年簽署CEPA，香港導演開展10年北上之路，多咗啲港人唔太啱睇嘅合拍片，唔少藝人主力北上開工。

Twins成員蔡卓妍(阿Sa)同鍾欣潼(阿嬌)、劉嘉玲、林峯同陳可辛早前接受大陸媒體講1997年回歸嘅感受……

劉嘉玲話80年代喺電視台工作，跟住就去咗拍戲，現時主力返大陸嘅劉嘉玲，當年由蘇州落嚟香港加入無線電視藝員訓練，對於兩岸o依家多咗合作，劉嘉玲喺訪問中就話兩岸交流，對佢嚟都ok，因為佢係由大陸去香港，所以對大陸嘅文化並唔陌生，o依家返大陸仲有親切感，覺得冇咩嘢，佢又話「跟香港本土的人，跟這裏的文化可能會有一點點衝突」。

講到電影產業北上，嘉玲直言現時好多工作喺大陸，反而喺香港工作比較少，對於香港同大陸專業人才合作，仲話肯定比以前好。

林峯喺出生福建廈門，兩歲跟家人嚟香港定居，喺香港讀完中、小學，就返咗大陸學唱歌，林峯訪問時就話一眨眼廿年，佢話香港好多製作團隊同幕後都嚟咗大陸，感覺中國電視市場係受全世界關注，林峯喺報道中就話自己生於一個好年代，仲話呢一代演員好幸福，有咁多機會、資源，有唔同劇本去選擇，認為好幸福，林峯話回歸當時冇特別感覺，只係覺得同「祖國拉進了一步」，好期待之後嘅社會環境發展。

最攞命係林峯讚中國科技方面進步得好快，有時工作完返香港，有一啲唔習慣就係電話冇辦法付錢，讚中國好厲害。

問到喺香港長大嘅Twins喺1997年嗰日做緊乜，阿Sa喺訪問中話自己讀緊書，當時同屋企人喺家中睇回歸儀式，喺阿Sa心中回歸後，首先要學普通話，因為以前係讀英文學校，出去受訪時講普通話，都唔知自己講緊乜，自嘲雖然o依家都唔係講得好，不過以前講得真係好爛，後嚟公司請人教佢哋，而Twins喺大陸發展一段時間，佢哋最驚訝係大陸好多人識佢哋嘅廣東歌，就算四川嘅歌迷都可以流暢咁唱廣東歌。