在一個行業工作一輩子，是很多上一輩香港人寫照，廟街陳華記刀莊老闆陳華（華叔）磨刀73年，由13歲學師，從未離開過，今時今日仍留守這個將近沒落的行業，固然是緣於對磨刀的熱誠，還有多年累積下來，他視如知己好友的熟客仔，與及令他名揚國騖的海外刀廠。

採訪：林穎嵐　攝影：麥超億

【交朋友　學道理】

位於廟街的陳華記刀莊，舖面雖小，但五臟俱全，店內櫥窗放置逾百把產自世界各地的刀具，不過，店內最奪目卻非刀品，而是牆壁上貼得滿滿的照片。年屆86，他牢牢記著每位相中人的相遇經過、個性和說話語調，「我唔想孤獨一世啊，所以我好鍾意學嘢，要俾自己增加多啲知識，有知識就唔會孤獨，佢可以令你聞好多道理……交朋友就係最好嘅（方法），每個人都有缺點同優點，你要自己去篩選囉。」

【珍藏顧客留言簿】

接著華叔在櫃子翻出一本「顧客留言簿」，他快手翻開其中一頁，「佢好巴閉㗎，噚日嚟㗎，佢啊俾我幾十個鞠躬我啊！」該頁除有名客人名字，最後還寫了一句「Wonderful！」華叔再翻另一頁，是一段中文留言，寫道：「神級巧手……砥礪鋒芒……無敵啊！華叔我永遠支持您……」原來是一位澳門客人的留言，「呢個澳門客嚟係因為佢帶個法國朋友嚟搵我買刀，咁佢唔識路，咪帶佢嚟囉，好好㗎佢！」

這本留言簿，除有客人親筆留言，某些頁數還夾著與留言客人的合照和客人給他的名片，華叔全都用透明袋珍而重之包好，「我啲客好多都係廚師嚟，好多外國人㗎，（咁你點同佢哋溝通？）好多都識講國語嘅，咁我都識A、B、C呢啲基本嘢嘅，成日都練默寫㗎，都話我鍾意學嘢嘛，學吓英語，識多啲人，個人冇咁瞢塞……」

【讚德國人最有禮】

華叔一介磨刀師，但在國際烹飪界上頗有名氣，店內張貼的照片許多都是華叔到世界名刀廠交流留影，例如德國孖人牌、金鼠牌還有日本歷史悠久的刀廠等，見識過世界不同國家的禮儀，「日本人梗係有禮貌啦，但我話你聽，最好禮貌嘅係德國人，但方式唔同……嗱！我隻手就生得衰啊，摸落好粗，好似鐵皮咁硬嘛，咁嗰時有間王牌刀廠（金鼠牌）有個高層就話『我唔係做呢行嘅』，咁之後佢同我握手，啲鬼佬咪好鍾意握手嘅，一握完就咁嘅樣，面口好難睇，即係話我冇料到啊！即係呢個意思囉！但佢當場冇講出口，咁啱先我幫佢磨好把刀，一剃，嗰啲外國人隻手咪好多毛嘅，將佢成隻手啲毛剃光晒，佢當堂跌落嚟咁濟， 嘩！我磨啲刀咁把炮！」華叔說得很雀躍，就連有客人走進舖頭都沒有為意，他續說：「咁後來佢請我食飯，見到我就話，『啊華生，唔好意思啊，我噚日咁對你』，結果佢請我食飯嗰陣，嗰時我哋喺德國嘛，冇米賣，佢蒸咗一盅仔米俾我食，嘩，感動到我流淚，嘩，佢特登駕車出去買俾我食，佢間屋又大又靚，人哋高層嚟喎，我？磨刀㗎咋，結果嗰餐飯我都冇食到，即係感動到我食唔落啊！咁樣道歉喎，我自問就做唔到喇。」

【磨刀要排隊 年底攞刀】

華叔一手磨刀好工夫，吸引不少外國名廚慕名而來請他磨刀，他笑言「依家磨刀，等到年尾啦，有得攞㗎喇！」牙擦刀王甚有性格，亦自訂磨刀規矩，「我接刀呢就分兩類，我自己啲客，即係我賣出去嘅刀，就一年到晚都幫佢磨，啲外來客的刀就分時間磨囉。」總之不論親疏，都要排隊。