羅力威相隔九個月再派新歌《少年遊》，今日去到商台做宣傳，佢指首歌內容都似佢本人，從來唔爭奪名利，只夠自己力爭上游。

有指英皇老闆楊受成收購亞視，曾為亞視前員工嘅羅力威承認，聽聞好多人咁講，至於是否屬實，要看老闆決定，佢話：「我不嬲都希望多啲平台可以開放，其實我離開之後，都有返過去拎嘢，同班舊同事私下都仲係好朋友。」

期唔期待重踏亞視？佢話：「我期待呀，我有個阿哥仲喺亞視做緊，佢冇呻話拖糧，咁我當然想人人有工開，希望邊個能夠慷慨﹑有勇氣出手拯救亞視，希望順利。」佢亦覺得亞視地方大而員工人數少，以往喺亞視都好少見到人。

身為前員工有冇乜嘢新建議畀亞視？佢話：「可以開劇集，開多啲音樂節目，可以搞頒獎禮，聚集番多啲明星，喺個台度壯大番，始終亞視藝員好少，基本剩番亞姐同亞生，我覺得首先諗辦法聚番啲人氣。」

如果亞視開劇，佢都好有興趣拍劇，因為平時做音樂時間唔多，中途空閒時間可以拍劇，自己都想多方面嘗試。講到可以做亞視一哥，佢笑笑口話：「唔會啦，不過我諗到宣傳句《羅力威劉錫賢》。」