【春嬌救志明】失落金像影帝 余文樂:我冇嘢喎
楊千嬅余文樂彭浩翔春嬌救志明
「第四十一屆香港國際電影節」今晚喺尖沙嘴舉行揭幕禮,而楊千嬅、余文樂同導演彭浩翔就率領《春嬌救志明》嘅一眾台前幕後人員,出席《春嬌救志明》電影節開幕電影出席首映禮。
千嬅同樂仔之前齊擔任金像獎頒獎嘉賓,千嬅爆樂仔超緊張,樂仔解釋話:「啲稿臨時都要改,驚接唔切,雖然得20秒,但都覺得好漫長,又驚講錯戲名。」問樂仔下次有冇興趣做司儀?佢坦言:「完全冇,見鄭中基又刀又槍又劍又炮,連碌嘢都爛埋,冇人好似佢做得咁好,成個金像獎綵排咗兩個月,氣氛好好。」
問千嬅有冇安慰失落影帝獎嘅樂仔?千嬅笑住話:「佢冇嘢喎,最大壓力都係背台詞,我有同佢講,一日唔會做晒成世人嘅嘢。」樂仔強調自己冇嘢,反而要回覆安慰自己嘅朋友,就覆咗好耐。」女友有冇親身安慰?佢話:「冇特別,正常,提名中我係最年輕,仲有大把機會。」講到頒獎時俾千嬅爆大鑊,樂仔笑話:「泰國嗰單都係我叫佢講㗎!仲要反應大啲,如果唔係就冇咁好睇。」