佘詩曼最近接受《魯豫有約一日行》訪問，講起一件往事。一年台慶，阿佘同佢個對手一齊企，等開場。阿佘聲稱當時佢見到前面發生咗一樣好好笑嘅嘢，於是佢就擰轉頭同佢對手講：「嘩，你睇！」但對手完全唔理佢，直頭當阿佘透明一樣，木然不動。（相關新聞： https://bit.ly/2JfNQze ）

鏡頭前嘅阿佘，做番當日嗰位對手嘅「木臉」表情，阿佘話當時都忍唔住睥（純眼神交代）咗對方一眼……魯豫問阿佘究竟對手當時係故意唔理佢、定係緊張到冇暇顧及其他？阿佘話：「我不知道。」

照推測，有幾位花旦機會都幾高，分別係鄧萃雯、張可頤，同黎姿。當年佢哋《金枝慾孽》鬥戲鬥風頭，到今日仲有故仔講。

雯女今晚到灣仔出席頒獎禮，受訪時被傳媒追問佢是否就係嗰個「白眼對手」，雯女笑：「係咩？我散光0架喎！就算有人白眼我，我都唔知。」亦否認係白眼／無視阿佘嗰位女演員。

那平時同雯女有冇偈傾？「其實我哋係學姐學妹嚟0架，因為我哋係協恩嘅校友，有時都會同我聯絡，講有關學校嘅嘢，早前有個老師想搵我，阿佘都有同我講。」即係冇不和？雯女笑言：「梗係唔會（不和）啦。」

精選娛聞，喺晒《娛果》
http://fb.com/appledailyent