吳京自導自演嘅《戰狼2》，截至今日下午二時，喺大陸上咗十日，收咗25億人民幣(下同)，平均每日收二億幾！

反而同日上映嘅主旋律，《建軍大業》票房只得3億左右，真係差天共地，古天樂部《喵星人》更大鑊，上咗23日，收得4,500萬，真係蝕入肉。部戲用咗好多錢做後期電腦特技，為令「犀犀利」(即係隻貓)像真度更高，之前導演陳木勝就話已經花費3,000萬港元(約2,500萬人民幣)…嗯嗯…

今次吳京套《戰》片收到咁勁，佢事前都冇諗過，所以佢梗係好開心，不過唔止佢一個人高興，聽講黃柏高（Paco）呢排都心情靚極，因為Paco監製嘅《殺破狼III》一早簽咗吳京、Tony Jaa同張晉主演，部戲明年中開拍，依家邊間公司手頭上有吳京嘅打片，大把人爭住要投埋一份。

今次吳京自己都有攞真金白銀出來投資拍呢部戲，總成本約1.2億。據行內人表示，呢部戲一早有公司包底8億人民幣，票房達到8億之後，保底方嘅收益將按照8億到12億、12億到15億，及15億以上三個層級進行收益分帳，票房達到25億後，吳京個人應該可以攞到約5億純利。

噚日佢帶埋其他主演張翰同盧靖姍去咗廣州謝票，平時好認叻嘅吳京，成功咗之後反而仲謙咗，話：「我們電影恰好戳中了觀眾喜愛的點，並不是我們做得有多麼的偉大。」