電影《神探大戰》今日喺灣仔舉行煞科宴，導演韋家輝、主演嘅劉青雲、林峯同蔡卓妍（阿Sa）等都有到場。韋家輝同劉青雲相隔10年再合作，劉青雲話大家好有默契，戲中有大量驚險場面：「佢知道我可以浸喺水幾耐、燒幾耐，爆炸要幾多秒走得甩。」林峯感激韋家輝畀佢好多挑戰。

劉青雲話自己好適合演韋家輝嘅戲，笑言自己有被虐狂，佢透露劇中要跳落急流：「事前有武師示範畀我睇，有一下差啲沖咗出閘。」佢又大讚阿Sa演得好好：「唔係夾硬讚佢，呢部戲真係好多平時睇唔到嘅佢。原本我有啲擔心阿Sa，佢未必好明拍緊咩，最驚險係佢要揸快車，聽聞我係倖存者。」

林峯講到拍攝期間，日日都要打醒十二分精神：「大家都有劫後重逢嘅感覺，精神上同肉體上都不停受挑戰，試過拍足36個鐘。」問佢有冇拍到想死？林峯話因為畏高，戲中又有好多高空嘅場面，但都要頂硬上：「我哋用嗰啲槍，直頭好似戰爭片咁，日日都係咁爆。」

提到會唔會同女友張馨月共度聖誕，林峯表示要畀時間同空間自己休息：「聖誕冇乜特別，睇下屋企人安唔安排旅行。」問佢係咪第一年同女友過聖誕，會唔會交換禮物？林峯又遊花園話：「唔講呢啲啦，禮物唔係最重要，工作以外嘅生活先最重要。」記者再追問佢係咪同女友一齊嘅生活？林峯鬼馬謂：「我唔會中計㗎。」

精選娛聞，喺晒《娛果》
http://fb.com/appledailyent