大陸今年先後發生火車相撞、傳送聖火受阻、西藏騷亂及四川大地震事件，內地網上流傳，呢啲事故可能同北京奧運吉祥物五隻福娃息息相關，因為「晶晶」咁啱係象徵熊貓，「歡歡」象徵聖火，「迎迎」象徵西藏羚羊，而象徵鳶（即係風箏）嘅「妮妮」，咁啱發生火車相撞嘅山東濰坊就叫「鳶都」，唯一未中招嘅福娃，就係象徵中華鱘嘅「貝貝」，點知噚日都喺舉行馬術賽嘅香港中埋招，意外死亡。而另一條本月中放生入長江嘅中華鱘，17號被發現死亡，死因不明。
五隻福娃輪流出事，好似應驗晒網民傳言，唔係邪得咁交關嘛！八方噚日請教堪輿命相專家馬禮華師傅，何解好嘅唔靈。馬師傅話，五隻福娃同五單天災人禍有關係，絕對係事後孔明，佢話五隻福娃根本冇可能有咁大能量，令到呢啲災難發生。
不過馬師傅話，今年屬木，而東方咁啱亦係屬木，正所謂同「性」相拒，所以佢一早預言中國今年會有好多人命傷亡，亦會有好多唔妥嘅事發生，五隻福娃先後中招，有人理解為一種預兆都未嘗不可。

大型祈福會搞唔成

生死有命，中華鱘喺海洋公園遇害，馬師傅話失去一條珍貴國寶固然好可惜，但如果正面啲睇，話唔定今次係國寶為香港「擋煞」，令到發生更嚴重災難嘅機會減少，而且今次意外，冇涉及重大人命傷亡，可以視為災難減輕嘅迹象，因為之前四隻福娃象徵嘅意外，都牽連甚廣傷亡無數。
馬師傅透露，自從內地發生咁多天災，本地唔少宗教團體，一度打算喺7月13號，即奧運舉行前夕，辦一場大型法事，開放畀所有市民同善信參加，為全國人民、北京奧運祈福，可惜當局未能配合安排，結果押後到9月先舉行。
救人宜急，大型祈福會暫時唔成事，佢話一班道教人士最近私下為中國祈福同誦經，祈求今年再冇天災人禍。內地天災死得人多，講到底都係人禍累事，如果唔係貪官興建豆腐渣學校，會有咁多學生無辜死亡？中華鱘俾海狼咬死，事件中係咪涉及人為錯誤，有人唔識養中華鱘又充專家呢？呢個問題十分關鍵，八方要求有關方面嚴肅處理，追究到底。

mailto:[email protected]