【陰性都要隔離㗎】袁文傑贊成檢控違反隔離令港人 怒斥漠視生命
蘋果日報 2020/03/23 16:45
留學生袁文傑
袁文傑今日在商台接受鄭裕玲（Do姐）主持的《口水多過浪花》訪問，他表示去年台慶曾跟Do姐合作過，所以今次獲邀感到開心：「喺我心目中有幾個殿堂級嘅司儀都好想合作，喺舊公司（亞視）嘅時候，我發夢希望同何B（何守信）師傅合作主持世界盃就好喇，98年世界盃真係實現到，之後亦都有一連串嘅合作機會。記得有年喺紅館做大型騷，佢臨出場前同我講『傑仔，我都好緊張。』我話『吓！師傅唔係丫嘛，你經驗老到已經咁樣。』後來我先知佢用心良苦，佢知我哋排得好熟，但後生仔唔好以為排得熟就可以玩，其實佢係想我收拾番個心情出去；至於Do姐，我記得有年嘅電影頒獎禮，佢做一個視像嘅訪問，講到過晒時間，佢公然『off』個嘉賓，所以佢哋兩個令我好深刻。」
講到由外地返港的人士，未有強制性隔離，又擅自剪去檢疫手帶，袁文傑講起都顯得有點勞氣，他贊成將這班人檢控：「大家都係自己人，返咗嚟會安心啲，但唔代表你可以放任，冇理由仲可以同朋友出去玩、飲酒，罔顧一切，你係唔負責任，難聽啲講，你係直接危害緊他人生命，所以我贊成檢控，咁樣先起到阻嚇作用。」有網民指他敢言，袁文傑說：「老實講，你講到危害生命呢樣嘢，理直氣壯吖！」袁文傑表示現時出街都會留意有沒有違反強制隔離和有檢疫手帶的人，以及他留意到住所附近，街上有不少被棄置的口罩，他反問大家有沒有衞生意識！
袁文傑讚何守信及鄭裕玲都是殿堂級司儀，榮幸曾跟兩人合作。
講到返港人士未有隔離，袁文傑勁嬲。
上得Do姐節目，例牌都要俾Do姐影相集郵。（IG圖片）