3DSLL在日本7月28日先正式推出,不過周五已經見到在部份Game舖出現,有齊紅、白同銀色機可以揀,筆者行過灣仔東方188的Game舖,水貨叫價一般都係$2,050左右,而日本正價賣18,900日圓(約$1,874港元),升幅都唔算離譜。行貨改名為3DSXL,售價亦公佈咗賣$1,749,不過就要等到9月28日先推出,而且區碼問題未明,唔少心急的機迷見個價合理都出手買日版機,一於早買早享受。
3DSLL與上代3DS比較,最主要是上芒3D裸視屏幕,由原來面積3,538mm2提升至6,767mm2,顯示面積大了90%,玩起來比舊版3DS更有空間感,立體圖層表達得更好,美中不足是解像度同舊機相同,玩遊戲時變相將畫面拉大晒,還好新機會對畫面進行優化,不致太鬆散。筆者以DS版《NewSuperMarioBros》試機,無3D效果下,畫面真係幾粗糙,都係玩番3DS遊戲好過喇。