每年臨近無綫台慶頒獎禮一定是非多多，好似早排林峯約無綫高層樂易玲同何麗全飯局，即刻被指冧高層博攞視帝。不過，原來唔止後生一輩喺頒獎禮前發力，連憑《溏心風暴之家好月圓》角逐最佳女配角嘅李香琴，同埋憑《銀樓金粉》爭視后嘅好姨薛家燕，都啱啱同無綫續咗約。
早幾日馮仁昭打電話畀琴姐，佢承認同無綫續咗兩年約，問佢覺得續約對攞獎係咪有幫助，琴姐話：「一定係楊怡攞啦，後生攞獎機會大啲，支持我嗰班好多都係60、70歲，邊識上網或者買本書仔填表格投票吖！不過當然如果有獎攞梗係好啦。」至於好姨亦承認同無綫續咗一年合約，兼且有同高層食飯，但就強調一切同攞獎無關。

另外，憑《移情別戀》爭視帝嘅苗僑偉（三哥），上星期五下晝都喺九龍香格里拉酒店同樂易玲同埋藝員部高層陳佩華hightea。噚日馮仁昭打電話問三哥擔唔擔心時間敏感，佢話：「我又唔係大熱門，千祈唔好亂寫呀，我哋只不過係傾工作咋。」至於樂易玲就話：「我哋同三哥係傾工作，其實林峯之後我哋都有同過好多個藝人食飯傾工作，呢個都係我哋嘅工作之一。」