京奧聖火傳到邊亂到邊，仲出到滅火筒兼淋水，認真火爆。中國運動員視金牌緊要過命仔，同樣火爆非常，好似最近喺福建晉江集訓嘅中國羽毛球隊，就傳出林丹痛毆教練事件。中國運動員為京奧付出第一拳，果然係「Weareready」！
林丹係男子羽毛球壇世界「1哥」，梗係13億人金牌希望所在，最近返鄉下福建集訓，更添衣錦還鄉嘅風采。周二，教練吉新鵬安排男雙訓練賽，結果林丹同陳郁嘅組合不敵鮑春來同陳金組合。喺在場咁多記者前失威，令林丹無地自容，於是搵吉教練算賬：「吉教練！」

李永波撐急躁無罪

好衰唔衰吉新鵬都係悉尼奧運金牌選手，一於扮聾同其他人傾偈，林丹見狀更加無名火起，雙方互相口角兼「撻威水史」。突然間，林丹一個北斗之拳擊中對方，當第2拳擊出之際，畀其他人拉開。在場記者面都青埋，為免影響京奧備戰，梗係唔報道呢單嘢啦！
周四，網頁《搜狐》率先報道，仲話當日總教練李永波講：「優秀運動員備戰梗係急躁啲，越早爆發越好！」打教練唔罰不特止，仲講到係好事？難怪林丹透過電話訪問話：「冇咩好講！你哋冇諗過報道好影響球隊同我㗎咩？」
噢！我求大俠差啲唔記得中國運動員攞金牌第一，其他嘢都好閒，唔怪得林丹可以咁囂張啦！其實之前08年南韓公開賽決賽，林丹就試過當眾掟拍，兼同南韓教練李矛互罵，事後大陸傳媒仲撐佢㖭！相信咁嘅騎呢現象，淨係會發生喺國內！隨住京奧越來越近，中國運動員備戰將進入「癲狂狀態」，好似林丹打人呢種行為，遲啲可能仲激嘅都有，大家不妨拭目以待啦！