【罕有同框】同老公橘慶太參加開學禮 松浦亞彌孭住3歲囡囡
松浦亞彌橘慶太
橘慶太夫婦被拍到帶囡囡參加開學禮,松浦亞彌負責孭住愛女。
現年31歲嘅日本女星松浦亞彌曾以Morning娘師妹身份走紅,佢於四年前與w-inds.主音橘慶太結婚,並誕下B女後,已淡出藝能界專心相夫教女,近年甚少公開露面。
兩人囡囡已經三歲大,佢哋於本月初被拍到一同參加囡囡開學禮,罕有被拍下一家三口照。據雜誌《女性自身》報道,囡囡入讀位於東京一間女子大學嘅附屬幼稚園,當日橘慶太用手機於校門外為囡囡與太太影相,而開學禮結束後,更由松浦亞彌孭住囡囡去停車場攞車,相當溫馨。
松浦亞彌年前過檔到丈夫所屬事務所,但佢指暫時以家庭行先,未有復出計劃。不過據知情人士透露,松浦亞彌一直諗緊復出時機,隨住囡囡入讀幼稚園,佢可能會開始準備復出大計。
精選娛聞,喺晒《娛果》
http://fb.com/appledailyent