陸永嘅老婆Reina噚日喺ig留言，講番喺舊年11月架新車俾人刮花咗，因為對方願意簽和解紙同賠償，於是Reina亦應承唔返原廠整，最後開出約2,600蚊賠償費。不過，對方至今仍未俾錢，原因係整傷腳，所以連和解紙都簽唔到，因為呢件事未解決到，所以Reina收到警方通知要求落口供。(新聞連結： http://bit.ly/2oT1y2f )

今日Reina又喺ig留言，佢仲貼咗2張whatsapp截圖兼話：「我緊張賠償的話，我唔會咁耐都未報價畀你！我絕對唔係為追$2600出post咁肉酸，我都驚畀人笑！請千萬唔好過數畀我呀！我唔要啦！無條件銷咗案喇！以後泊車小心... #唔要二千六唔會死 #無端端受人氣屈住可能會死 #我都只係一個鍾意上網嘅小市民」

原來對方質疑Reina之所以將呢件事曝光，除咗係呃like之外，仲利用小市民上位，Reina就回覆對方，強調自己冇提及過方嘅身份，亦只係轉述警方嘅說話，跟住有網民留言覺得Reina公審對方，不過亦有人力撐Reina，最後一張寫住：「有咩好審？由頭到尾我都冇話人唔還錢，我淨係覺得自己受咗氣。」陸永都有留言撐老婆：「幫佢delete再唔收佢錢，其實佢仲想點？點解仲要send啲咁嘅嘢嚟？」

精選娛聞，喺晒《娛果》
http://fb.com/appledailyent