《蘋果》動新聞打破傳統,《爽報》更犀利,係一份既有得睇,又可以「聽」嘅報紙。八方透過特別途徑,除咗睇過《爽報》試版,仲已經試聽過《爽報》,果然係非一般體驗,顛覆八方「睇」報紙多年嘅觀念。為你朗讀《爽報》新聞嘅靚聲「播音員」,包括彭晴、梁繼璋、李志剛,手機即上m.sharpdaily.hk就有得聽。《爽報》除咗新聞,仲有唔少創意之作,例如陶傑嘅專欄《眼兒媚》寫情色小說;牛佬用漫畫同你畫新聞故事。
八方噚晚聽到三人用自己嘅鬼馬方式「聲演」新聞,彭晴扮聲讀國際趣聞,令人感同身受、梁繼璋風騷演繹千人裸泳,相當傳神。三把靚聲都話咁樣讀新聞好得意,梁繼璋話佢哋要令受眾覺得新聞「聽,好過睇」,讀趣聞唔難,反而讀大膽嘅新聞,好似風化案咁,就好有挑戰性啦。八方期待佢哋嘅「聲演」。