以三國為題嘅電腦Games多不勝數，淨計《三國誌》同《三國無雙》系列已經係Game廠搖錢樹，戰略、動作、格鬥乜類型都有，就連《闇三國》嘅DOTA形式玩法（遺蹟保衞戰），亦唔係咩新鮮事，所以廠方今次就力Sell首創嘅10打10、總數20人場內激戰！代言人阿旦，今日就踩入旺角網吧，搵咗三位網友嚟個4P切磋交流。「DOTA梗係越多人越好玩，以前最多都係5打5，今次可以10打10，一定好刺激！」其中一位機迷阿謙，唔敢直望阿旦上半身，不斷低頭講隻Game，企圖壓抑臉紅窘境。為免大家尷尬，不如即刻開波試玩。處男下海嘅阿謙，居然無被玩開嘅敵對網友阿飯恰死，大家實力可以在伯仲之間。原來喺PVP模式之下，《闇三國》刪除了常見嘅升級系統，而玩家喺關卡模式得到嘅強化能力，亦唔會帶到PVP競技場。換句話說，所有人落到場都係新兵，勝負完全取決於技術掌握，夠公平！最過癮係「娛樂模式」，強調速戰速決，賺錢速度超快，快打快殺賺到爽！

劉、關、張、曹操、諸葛亮呢啲當然係三國熱門人物，但其實唔少冷門啲既角色一樣有佢哋嘅Fans。《闇三國》就提供咗過百武將，俾玩家免費揀落場任砌，口味幾重都總揀到心愛人物。各角色有唔同特殊技能，以貂蟬為例，現實中阿旦嘅噴血Cosplay造型，令宅男們目定口呆，遊戲中則以一招「傾倒眾生」，令有效範圍內敵人「定鏡」任你打！另一位網友阿飯，就喺現實同Game內，都中晒呢招「傾倒眾生」，狂輸畀阿旦喇。官方更會定期更新角色能力，強調絕對公平，遊戲中絕無最強角色，只有玩家互相取長補短，先係求生之道。
遊戲亦有傳統嘅破關升呢玩法，第三位網友楊生，就話鍾意玩關卡模式多啲，一來可體驗故事內容，二來亦獲得升呢滿足感。咩理由都好，見到三位「宅宅哋」網友嘅沉迷眼神，最大願望應該係漫漫長夜對住阿旦同《闇三國》喇。