《蘋果》記者今次到洛杉磯直擊第89屆奧斯卡頒獎典禮，並到後台訪問得獎者。

大熱電影《星聲夢裡人》奪得6個獎項，但失落最佳電影，而且唔止係失落咁簡單，而係頒錯獎同拎錯獎。真夠尷尬！！！！

依家嘅問題係，究竟係負責頒獎嘅華倫比堤同菲丹娜蕙讀錯咗？定係工作人員俾錯咗？

睇番現場，手執名單嘅華倫比堤望住賽果，表情有啲猶疑，打開紅色信封睇下裡面係咪有另一張得獎名單——冇喎！

於是，華倫比堤又起勢咁「甩」——甩牌咁甩，令人猜測究竟係咪華倫比堤見到得獎名單唔對路、於是用力係咁捽張卡，睇下係咪仲有一張得張名單。

可能因為「甩」極都「甩」唔到，華倫比堤放棄，並將呢封得獎名單遞俾身旁嘅菲丹娜蕙……之後發生嘅事，大家都知道……

出爐影后愛瑪史東對台上發生嘅事懵然不知，事後她到記者室受訪時，講咗個更爆嘅消息—— 愛瑪史東聲稱，自己一直拎住最佳女主角得獎名單張卡。

愛瑪史東回答時，一度爆粗謂：「I fxxking love 《Moonlight》，God I fxxking love 《Moonlight》！呢套係一部好好嘅電影。宣佈我攞女主角獎之後，我一直都攞住寫住最佳女主角得獎張卡，o依家仲喺我手上，所以我唔係好明大會點解話頒錯獎、係因為俾錯華倫比堤最佳女主角張卡佢讀。」

真正答案，要問華倫比堤先至知！

出爐影帝卡斯亞弗力（Casey Affleck）(《情繫海邊之城》)亦有去記者室受訪，他稱今次特意感謝家人，因為之前得獎時未有提及家人惹來微言。卡斯亦表示自己從大哥Ben(班亞弗力)身上獲益良多。記者問卡斯上台前哥哥是否說了些充滿啟發性的說話？卡斯笑言：「沒有，他只叫我have fun及享受當下而已。」

獲「最佳攝影」的《星聲夢裡人》(La La Land)攝影師Linus Sandgren於後台被問到，頒獎禮上自己名字被宣讀的一刻有何感覺？他表示腦袋一片空白，不過感到相當榮幸，非常美好。

榮獲「最佳動畫」的《優獸大都會》（Zootopia）兩位導演Byron Howard、Rich Moore及監製Clark Spenser受訪時，被問到動畫與電影講故事方法有何不同，及有何過人之處？Rich表示動畫有時能跨超越國籍，例如《優》中的動物，不同國籍都會有同感，可以與角色聯繫。

Colleen Atwood憑《怪獸與牠們的產地》贏得最佳服裝設計獎，接受訪問時，有記者問到《哈利波特》系列電影以往從未得過此項殊榮，今次作為《哈》片得獎創做歷史感覺如何？Colleen表示好震驚，原來《哈利波特》未得「最佳服裝設計獎」，她表示：「《哈利波特》電影也有藝術性，我現在才知道《哈》片未得過這個獎項，實在難以置信。《怪》片時間設定在20年代美國，與《哈利波特》不同。」

《鋼鋸嶺》贏得「最佳混音獎」，3位得獎者於後台受訪時，Kevin O'Connell表示自己是第21次獲提名，沒想過能得獎：「感謝導演米路吉遜，以及身邊兩位拍檔。」而來自澳洲的Andy Wright則表示澳洲拍攝電影質素也很高，不單只荷里活專美，可以多到澳洲拍戲。

《星聲夢裡人》美指David Wasco獲最佳美術指導，於後台接受記者訪問時，提到與導演戴米恩查素合作經過，佢表示導演能清楚表達自已的要求。導演對美術亦很感興趣，會召集所有不同部門如道具、攝影開會，所以人人都有共同目標、想法，幫助導演完成心中所想，實在非常難得。David更大讚取景地洛杉磯是一個好美麗的城市，教人着迷。

最佳紀錄片《O.J.:MADE IN AMERICA》導演Erzra Edelman於後台被問到案件發生於多年前，如何感到與此案有聯繫？佢笑言：「我個樣生得後生，我當時讀緊中學，喺華盛頓D.C睇到審訊過程，對我來講係一個醒覺。制度、警方對黑人不公正。」佢認為雖然案件發生左好耐，但歷史反映現在。

《蘋果》記者丁焯敏洛杉磯報道