黃夏蕙、艾美琦(Amy)、黃榕、柯嘉琪等，噚晚喺尖沙嘴The One商場出席「愉美人競選大賽」活動，原來夏蕙姨喺2010曾經參加過，仲攞埋嗰屆嘅冠軍，佢話：「當年朋友叫我選，年紀大至可以選，但我都70幾歲人，真係唔好喇，咁老，不過朋友幫我畀咗$1500報名費，話如果我入選就還番$1500畀佢。」最後夏蕙姨入咗選，佢覺得既然入選，就應該畀心機去做，結果佢拎到才藝、跳舞、唱歌、服裝方面4項冠軍。

夏蕙姨好自信咁話：「一個人嘅成功唔係靠運氣，而係要經過努力。我初時都唔想去選，17歲選過工展小姐，相隔幾十年再選，自己都怕。」而未來嘅目標，當然就唔係選美啦，夏蕙姨好有心，想搞老人院，選址喺大埔，仲包生養死葬，佢話嚟緊自己嘅87歲生日，11月30日當晚，會喺九龍灣大排筵席80圍，搞籌款晚宴，希望籌到幾千萬，建老人院。

至於夏蕙姨嘅契女Amy就話：「契媽成日叫我去選美，唔好啦，我咁樣衰，」至於夏蕙姨嚟緊嘅籌款生日宴，佢哋一班契仔女都會幫手演出籌款。黃榕講到選美，話見到夏蕙姨咁勤力，自己都唔可偷懶，不過選美就冇膽量同自信。