當年今日

中環在線:滬政府貼房津搵人才 - 李華華

蘋果日報 2008/10/06 00:00


金融海嘯,華爾街一班天之驕子都要失業,不過,天無絕人之路,美國華爾街唔請你,大可以嚟中國搵吓機會。好似中國國際金融公司(簡稱中金),就第一時間走去向美國招攬精英。好多國企、民企都希望請到有國際視野嘅人才。
為咗吸引外國人才,偉大嘅祖國亦都好識做,據《東方早報》報道,上海政府為咗吸引特殊人才,不惜提供房屋津貼,符合條件嘅人才仲有希望可以買或者租住到經濟適用房,等呢批專才喺大陸安居樂業。
重點招攬金融高新技術
至於乜嘢係特殊人才?係指內地想重點發展嘅行業,好似高新技術產業、金融業等,簡單啲講,高學歷、高能力、精通國際事務又創新嘅人才,都係上海市招攬嘅對象。
早一年,大陸樓價越升越高,雖則家陣回落啲,但要吸引到外國優才嚟中國幫你打天下,唔畀啲甜頭點得,所以報道話,上海政府首先就鼓勵請人嘅機構自己拎錢出嚟,補貼班特殊人才,又鼓勵有條件嘅大機構,自己起啲公寓出嚟,租畀啲人才。淨係「鼓勵」梗唔夠,所以上海政府亦正研究緊點樣為呢班人才設立住房保障,由政府設立專項資金畀住房補貼。
既然一班金融精英喺華爾街冇運行,咁不妨東來,可能仲好世界呀!
李華華
mailto:[email protected]