剛戰打吡大賽日，半數頭馬於對上一仗造出全場最快末段，周三晚谷草共有九駒剛造全場最快末段，且看能否如剛戰般連場建功。其實計算馬匹締速，在沙田賽事較為重要，反而谷草始終着重形勢，睇締速之外，亦要留意馬匹陣上取位及際遇，蝕位跑得好嘅馬，縱使未必有上佳締速配合，亦應另眼相看。如第五場「皇龍大師」便屬於此類馬，上仗配湯智傑跑谷草2200米，早段留守尾叠，對面直路中段開始在外叠踩油，可惜未能在入彎前帶離切入，結果整個彎位被頂在四叠無遮擋，耗力甚多之下，入正直路仍能一度透出，奈何中段用力太多致終點前無以為繼，僅負不足一身位跑第三。今仗出王牌再來，寧願超磅都要用韋達，兼且抽得二檔，蝕變賺形勢大逆轉，估計必可守於貼欄位置留力，有力勝回一仗。