亞視新聞噚晚率先報道主要投資者王征與股東黃炳均將出售控股權給港視主席王維基，但港視今早即發聲明否認與亞視達成任何協議。主理新聞部嘅亞視高級副總裁劉瀾昌今早返回公司時，否認亞視獨家賣盤消息係「造假」，認為當時是較準確報道公司決定。

劉瀾昌聲言，報道係單方面亞視消息，只係講出亞視有呢個賣盤決定:「呢個係單方面意向，公司決定想賣俾王維基，但王維基係咪接受，那是後續，之後王維基否認……」可是問到何以未待王維基有所決定就急急公佈？劉瀾昌有點「口窒窒」謂:「噚日係重要日子…我唔係太清楚。」之前有消息指政府將於3月31日(即噚日)決定亞視生死，故劉瀾昌此言，變相亦等同承認亞視「獨家賣盤」消息係拖延時間之計。

至於可擔心亞視新聞部公信力再受挫？劉瀾昌揚言:「唔擔心，新聞一定要搶，最後仲要睇發展，我自己諗仲有其他買家…」劉強調當時股東希望發佈此消息，但承認當時知道事件仍在發展中，並非最終決定。

亞視執董葉家寶今早八點幾返抵亞視總台，暫未有回應。