新一輯嘅《美女廚房》由蕭正楠、林盛斌（Bob）同張振朗主持，有睇過當年第一輯嘅觀眾都會知道，做呢個節目雖然係好多靚女睇，但係有苦就真係自己知，每集都要冒住肚痾風險試食，真係要帶止痾藥防身先頂得順。

今日又到節目錄影時間，三位主持一齊接受傳媒訪問，佢哋個個都話每次錄完都會痾足半日，問到蕭正楠會唔會帶女友黃翠如上嚟做嘉賓？佢就笑言呢啲嘢佢一個人受就夠，唔好連累兄弟。

阿Bob就投訴第二集嘅嘉賓劉佩玥同JW王灝兒煮嘅嘢根本未熟，搞到佢吞咗都要嘔返出嚟，不過佢話相信佢兩個都唔係有心嘅。

而余香凝嘅細妹余潔瀅（Zoe）就以美女學徒身份參加節目，佢話自己嘅廚藝係跟阿媽學，識得整川味冷盤，仲話家姐食完都會讚。

精選娛聞，喺晒《娛果》
http://fb.com/appledailyent