前特首董建華愛港愛國係人都知，唔知係咪眼見港股近幾個月不斷插水，由31600幾點高位係咁跌，得番23800幾點，心痛不已，眼見曾特首闊佬懶理，冇幫手托市，終於忍唔住親自出手，撐起港股，喺近1個月內大手掃入家族生意東方海外（316）嘅股份，對港股投下信心嘅一票，奈何港股同東方海外仍然冇乜起色，不斷尋底。
港交所噚日最新披露，老董家族今個月內第三度增持東方海外，喺15號至17號3日，購入175.6萬股。華華睇番老董家族對上一次連續增持東方海外，係舊年12月中嘅事，同樣係連續3日增持。華華計過，連埋今次，老董家族喺短短一個多月，6度增持東方海外，總共使咗9412萬銀，買入近197.7萬股，家族嘅持股量由67.82%，增加至68.14%。

增持無助股價

不過東方海外股價同港股一樣，係個漏氣嘅氣球，點吹都吹唔脹，股價不斷滑水，由舊年12月18日增持至今，股價累跌近兩成四，噚日收報41.05蚊，創06年11月以嚟嘅新低。無他嘅，市場預計航運業周期見頂，淨係睇老董嘅Friend李超人誠哥，早排係咁減持手上嘅中國遠洋（1919）同埋中海集運（2866）股權，就知航運股冇景。老董連自己公司東方海外嘅股價都撐唔住，睇怕想幫手撐港股都無能為力囉。
電郵：mailto:[email protected]