貴為全國政協副主席嘅前特首梁振英卸任年幾，頻頻出post講時政「滅獨」， keep住「高人氣」，相反「龍蝦夫人」梁唐青儀就平實得多，冇做第一夫人以嚟都係搞吓慈善、做吓活動嘉賓咁。好似今日佢就去咗佢朋友、拍賣官金鈴設計嘅陀飛輪發布會，着住件粉彩上衣嘅佢，氣色都唔錯。

不過唔知梁太怕醜定係耍大牌，被主持叫極佢上台都唔肯。話說主持叫身兼慈善團體「齊惜福」嘅發起人梁太講幾句，但梁太好似受寵若驚咁，淨係喺台下祝賀金鈴，仲解釋自己同金鈴嘅淵源。原來係港產陀飛輪「萬希泉」品牌一路都有向齊惜福捐出鐘錶，畀佢哋用作慈善拍賣之用。金鈴嚟緊10月都會再度為佢哋擔任拍賣官。

之後金鈴專登走落台，同梁太合照，低頭細語咗幾句，令梁太終於肯上台啦。金鈴上到台話，自己都要捐一隻陀飛輪畀梁太拍賣：「藍色定粉紅色，你揀！」原來善事有望加碼，唔怪得梁太都畀面上台露面啦。梁太臨走仲有好多人追住要同佢selfie，認真受歡迎，現場雖然人少少，但人氣唔輸得過喺鍵盤背後嘅老公㗎。