明言下屆立法會唔會再尋求連任嘅主席曾鈺成，今晚7點喺中華廚藝學院餞別議員，立會秘書處安排咗大巴接載議員，泛民、建制都有議員出席。席間曾主席高歌一曲《忘盡心中情》，大玩改歌詞，「Tree根開邊瓣只有天知」、「元秋搵嘢講用肺就容易」。嘩，估唔到主席完全無就住就住，「嫻姐張宇人大輝仲有怪醫鬧政府似足泛民問契仔稟西環未」、「星哥扮晒領導人」，之後唱另一首歌，主席仲搵埋做過舞蹈老師嘅夫人伍嘉敏伴舞。

葛珮帆今晚喺facebook直播主席唱live，有盧偉國吹色士風伴奏，「會議廳苦中自娛立法會好多奇事」，睇怕係「唱盡心中情」先真。歌詞無分泛民建制嘅，「服左AV仁𥄫女要用手機」、「毓民鬧人唔使擇日子」，仲有開會瞓到好似有生命危險嘅黃定光，「象哥猛扯鼻鼾食太多話梅陳皮」，亦不忘話「拉布唔怕臭又長一剪話咁易」，同埋當然唔少得波蘭密友梁國雄，「長毛好冇譜亂掟嘢撳唔住」。唱到最後仲好感慨添，「發咗好多夢留下笑與悲立法會此番別離莫再講那非和是」，立會原是夢一場。下面就係足本歌詞：

《忘盡心中情》(曾主席搞笑版、盧偉國議員演奏）
忘盡心中情　遺下愛與癡
會議廳苦中自娛
立法會好多奇事
服咗AV仁??女會用手機
象哥猛扯鼻鼾　　
食太多話梅陳皮
長毛好勇武亂掟嘢撳唔住
毓民鬧人唔使擇日子
拉布唔怕臭又長一剪話咁易
嫻姐張宇人
大輝仲有怪醫
鬧政府似足泛民
問契仔稟咗西環未
元秋搵嘢講用肺就容易
Tree根開邊瓣只有天知
星哥扮晒領導人乜都想話晒事
發咗好多夢　留下笑與悲
立法會此番別離　
莫再講那非和是
難捨長年同事

至於餞別主席嘅晚宴，點解要喺中華廚藝學院？聞說呢個係內會主席梁君彥嘅意思，事關佢想支持吓職訓嘅學生喎。今晚開飯前，大家竟然大膽到想瓜分主席寶座添呀。定啲嚟，講緊嘅係切蛋糕環節，個蛋糕嘅特式在於有張主席櫈喺度，當大家準備一嘢切落去嘅時候，就有人提醒唔好切爛張櫈。切完之後，大家就開飯喇。