正當老婆李敏貞忙緊同韓流天王Rain拍攝新劇《回來吧大叔》之際，身為老公嘅李秉憲亦周身唔得閒，成功憑賣座韓片《寒流黑金》（前譯：內部者們）翻身嘅佢，今日戴上黑超，以一身充滿星味嘅打扮，經韓國金浦機場出發飛去美國參加下星期嘅奧斯卡頒獎典禮，以及之後嘅日本粉絲見面會。

難得李秉憲成為首位韓國演員獲邀出席奧斯卡盛事咁威威，粉絲都好識做，高舉橫額送機，o氹得李秉憲好開心，要簽名咩？當然冇問題。不過當佢準備行入禁區時，自動玻璃門居然唔生性冇打開，請佢食閉門羹，搞到李秉憲勁尷尬，要舉高手搵海關人員救佢，真係慘慘豬。