華人置業主席劉鳴煒，教班年輕人「睇少啲戲，去少啲日本嘅」買樓大法，真係唔知要慳幾耐先至夠錢俾首期，租樓或者得嘅，依家租金回落嘛。

「廢青」冇得去日本，又唔上上大陸消費，咁咪去下香港嘅主題公園囉，橫掂都係咁多自由行0架啦。如果你去港島嗰個主題公園，仲會見到劉鳴煒添!

身為主題公園副主席嘅劉鳴煒，都真係童心未泯。佢最近喺個blog自爆，話繼去年趁萬聖節客串扮咗一日鬼之外，今年再接再厲，扮足7日，仲搵咗服裝設計師Polly設計佢啲衫，所以佢啲衫係與別不同，有閃燈等等裝飾。

不過劉鳴煒為咗保持神秘，所以事先冇同人講，而好多一齊扮鬼嘅演員，要等佢除咗套鬼衫，先至知其身份。

其實劉鳴煒扮鬼亦有跡可尋，原來每次佢落去扮鬼嚇人娛己之時，都會帶埋兩個秘書陪，公園仲搵咗兩個保安全程跟實。今年雖然扮足7日，但聽聞佢仲未夠喉，呢幾日都會落去繼續玩，而周六(31日)佢亦都會落場玩埋最後一日喎。