第53屆金馬獎喺噚晚已經曲終人散，所有獎項已經名花有主，金馬影帝由大陸演員范偉《不成問題的問題》爆冷奪得，影后就由《七月與安生》嘅周冬雨同馬思純同奪。金燕玲則憑《一念無明》奪得最佳女配角，最佳男配角由《六弄咖啡館》嘅林柏宏奪得。

大會喺台北文華東方酒店舉行金馬惜別酒會，出席有金燕玲、黃進、范偉、林柏宏同林依晨等人出席，金燕玲話今次感受好大：「相隔22年後再攞，人生已經過咗三分之一，當中經歷有好多起伏。」舊年金燕玲雖然有份提名，不過失落獎項，唔知今次拎獎會唔會覺得出番啖氣？佢話：「我覺得係為自己爭咗啖氣，不過我今次唔記得喺台上多謝女兒同阿蘇(蘇施黃)，阿蘇話自己人唔使駛多謝，不過我都對唔住佢，唔記得多謝佢。」

金燕玲仲好搞笑話：「原來另外2個演員都係零片酬，但係我好唔好意思，收咗封利是，仲攞埋個金馬添。」不過佢冇透露利是有幾多錢，喺身邊嘅導演黃進就話：「用200萬拍得，都唔會好大。」黃進仲話唔記得多謝爹哋媽咪，希望下一部戲可以有多啲錢，俾演員同工作人員得到應得嘅嘢。」

至於爆冷成為金馬影帝嘅范偉，佢話事前冇諗過會贏，今晚可能會飲少少高樑酒慶祝。