韓國tvN綜藝節目《名單公開2018》噚日播出最新一集，當中節目就公開由觀眾投選出來嘅Legend(傳奇)男團，結果由天團BIGBANG當選。

冠軍BIGBANG獲得超過1,500名觀眾選出佢哋心目中嘅No.1男團，當中BIGBANG以《Lies》一曲打響名堂，更掃走多個獎項，令到BIGBANG紅遍世界，即使各成員展開個人活動都十分成功，所以被稱為「Legend Of Legend」。

至於第二位及第三位就分別由防彈少年團(BTS)及EXO獲得，BTS於2013年出道，佢哋於大前年推出歌曲《Dope》紅遍海外，之後多首作品都大受歡迎，現時佢哋喺歐美更屬於最高人氣嘅韓國男團。而於2012年出道嘅EXO一出道已火速走紅，更試過連續5年喺《MAMA音樂頒獎禮》上奪得最佳專輯，成績備受肯定。

而第四位就屬於元祖級男團H.O.T.，於1996年出道，2001年解散，但佢哋依然大受歡迎，出道專輯過百萬銷量，同時佢哋當時嘅收費fans club仲有超過10萬名嘅粉絲，開創咗粉絲團嘅文化，今年佢哋仲合體出演人氣綜藝節目《無限挑戰》，仲因為有太多粉絲申請做觀眾，令到節目要換到更大嘅場地，同時H.O.T.嘅經典歌曲仲再次登上音源榜。

佔第五位則係新男團Wanna One，佢哋去年因為演出選秀節目《PRODUCE 101》而成功出道，只會作18個月嘅限定男團，不過佢哋出道後即太受歡迎，出道專輯更創百萬銷量，Wanna One原定今年年底解散，但有望延長至明年初才解散。

更多韓流，喺晒《娛果》
http://fb.com/appledailyent