昨日亞洲股市跌到一仆一碌，花旗股市前晚大跌，震散咗近期強勢嘅亞洲股市，花旗跌得急，沽盤插得狠，大成交低收，喺咪股災來臨？好難講，股市千變萬化，「10月股災」係人諗出嚟嘅規律，實際上冇話唔可以喺11月發生。
如果大家都同意花旗嘅樓市同經濟唔樂觀，靠內部消費支持經濟嘅情況就好難樂觀，前晚花旗股市大跌，除咗兩大銀行俾人downgrade之外，一啲同消費相關嘅數據好差都係原因之一。花旗股市要出現股災，應該唔使專登搵理由，因為充份嘅理由好早就擺咗出嚟，只係冇人係先知，可以準確講出發生時間。無論點，花旗股市起碼要出現較大嘅調整以反映經濟前景，應該都無可避免。
本港減息之後正式進入負利率年代，股市同樓市都睇好啲，呢個係趨勢，趨勢中間會有波動，花旗嗰邊跌得咁大力，港股又點可以話詐唔知，話晒都係國際金融中心，花旗跌，港股係咁意都要跟吓，而且恒指升咗咁多，調整幾千點都係濕濕碎，唔好覺得好大件事，不過外圍風頭火勢，炒賣小心啲好。

3763博賺25%

中糧C輪3763：中糧（606）昨收5.69元，唔算跌得多，低位反彈力強，個市定番啲可以上試6元，破位睇6.80元，可以買啲C輪3763炒短線，隻輪現價36仙，有效槓桿率1.3倍，對冲值0.81，數據唔靚，但中糧C輪得佢一隻。正股升上6.80元，3763會喺45仙樓上，有25%升幅，正股跌穿5.20元止蝕。