「反送中」運動踏入第三個月，示威衝突依然無日無之，香港市民呢幾個月嘅感受可謂非常深刻。

住喺香港超過十年並持有香港永久性居民身份證嘅冠軍騎師潘頓，主動問記者們特首林鄭月娥宣佈撤回《逃犯條例》修訂後，香港嘅局勢會點樣發展，大家你眼望我眼，冇乜頭緒，相信唔少馬迷都有同感。

潘頓身為香港冠軍騎師，收入豐厚，但對答有時都好直接，大家日日都關心港鐵嘅車務狀況，究竟佢對上一次乘搭港鐵喺幾時，原來已經喺四年前，有一晚到中環出席宴會，散場後附近一帶非常塞車，決定坐港鐵返沙田馬場騎師宿舍，之後出入都靠私家車代步。

大家都份外留意嘅旺角，原來潘頓同太太間中都有去，不過就唔係行彌敦道或波鞋街，而係花墟，兩公婆都會一齊挑選盆栽買返屋企。

講開挑選，今日（8日）第十場三班1400米，潘頓操過沈集成馬房「紀利雄星」兩課後，呢場最終騎從未操過、蘇保羅馬房隻「心多多」，表面上好似棄騎，但實際上唔係。

「紀利雄星」有報跑開鑼日（1日）同程1400米，嗰場一早搵定潘頓，點知就列作後備一，最後補唔出。

沈集成於是馬上再報跑今日尾場，但呢場蘇保羅早喺8月中已搵定「心多多」用潘頓，潘頓亦遵守應諾策「心多多」，所以「紀利雄星」回配贏馬拍檔田泰安，邊隻機會較好，真係跑過先知！

-------------------------------
想唔想知自己財運、事業、愛情會點？參加《玄機解馬》節目，可免費畀美女堪輿學家唐碧霞睇八字、睇相指點迷津，快啲入嚟報名。
https://forms.gle/dN9hfSiFxc7T8E436
-------------------------------
馬匹賽績、騎練數據、名家貼士
【最強贏錢武器 盡在蘋果馬網】
https://hk.adai.ly/e/5nFdCiYq8Y
-----------------------------
【撐學生】
召集有心人 撐學生全年睇《蘋果》
立即按此