日本組合AKB48喺年尾年頭呢啲日子特別忙，尤其係現任一姐渡邊麻友，參加完《紅白歌唱大賽》之後，又要出席通宵音樂節目《CountDownTV新年特輯》，仲要直踩喺昨日做元旦演出，終於搞到麻友頂唔順病倒。

今日下午AKB官方網宣佈麻友因為患上感冒，喺今個月4日至6日舉行嘅握手會同簽名會都會全部缺席，睇嚟相信佢嘅感冒都相當嚴重。其實呢幾日佢哋都不停有成員病倒，包括昨日連元旦演出都要缺席嘅渡邊美優紀，據指係因為發高燒而要休息。