英國粗眉名模CaraDelevingne早前喺twitter表示不滿有外國狗仔隊專偷影佢裙底，連日來喺網上表示正部署點樣報仇。佢前晚同女友St.Vincent一齊出招，用水槍射人報復，令其他記者無辜受罪。

23歲嘅Cara帶同33歲音樂人女友St.Vincent及英國女星施安娜美娜（SiennaMiller），由倫敦家中出發到《LoveMagazine》雜誌舉辦嘅聖誕派對。大門一開時，着咗上黑色大褸、戴上外套帽嘅Cara與St.Vincent，一起拿着強力水槍。St.Vincent一馬當先，用水槍不停射喺門外等候嘅記者。Cara就露出得戚笑容，跟在女友身後，上車時亂射記者，記者嘅攝影器材濕透，加上倫敦天氣寒冷，令人又濕又凍。
不時露出古惑的表情嘅Cara與女友上到車後，仍然未肯放過在車外的記者，從車窗繼續以水槍攻擊。

於雜誌舉辦嘅聖誕派對上，Cara同女友好低調，反而黏着家姐Poppy及施安娜合照。施安娜則於派對中遇上剛在7月分手嘅舊愛英國男星TomSturridge，二人毫不尷尬笑得開懷，可能有復合機會。而施安娜另一舊愛祖迪羅（JudeLaw）的兒子Rafferty也在場。