【李華華Online】創仔執董俾人揼 阿囝接收數佬恐嚇電話
蘋果日報 2019/12/18 22:45
譽滿國際
上市公司不時有古靈精怪通告嚇你一跳，好似今日譽滿國際（8212）就披露一單內幕消息，不過有啲內文就好似講緊單突發新聞咁。
用番人話翻譯，譽滿國際就話接獲控股股東、前任主席同執行董事吳國榮通知，佢響兩日前響公眾地方俾一個唔識嘅男人揼（在公共場所被一名不認識的男性野蠻襲擊），受傷之後佢個囝就收到一個電話，話唔還錢就斬你屋企人（若吳先生不還債，有人會砍殺吳先生之子及其母親。）。同一時間，另一個執董亦收到匿名電話懷疑黎自收數佬。公司順便講埋，舊年五月底有十幾個惡人（面相兇惡的男性）踩上Office搵吳國榮並且搞事。
突發新聞過後，終於講番財經野。原來吳生在港4宗法律訴訟中被起訴，其中1宗申索由西證（香港）證券經紀有限公司提出，涉及1.63億元收購譽滿國際控股權的融資。吳生家陣積極抗辯經紀的申索，更提出反申索。
咁公司就保證，大股東債務同公司無關係，業務經營仍然維持正常及未受到影響。不過講時講，譽滿國際6月份開始停牌，如果出年6月前搞唔掂，祝各位股東好運。