701收料站:兩隻理文揀造紙

蘋果日報 2004/06/30 00:00


呢排連續多間公司公布業績都好靚仔,令投資者對本港上市企業信心大幅回升,而業績則成為近排炒作嘅主要理由。
經紀黃早在5月底,已經大聲疾呼話可以趁低收集理文造紙(2314),等公布業績。早兩日,理文造紙宣布將在7月6日公布全年業績,之後隻股表現即刻唔同晒,股價造好之外,成交量亦顯著上升。
理文造紙噚日最高見過7.05元,收6.95元,升2.96%,成交股數191萬股,金額1330萬元。
至於由同一家族持有,業務係生產手袋嘅理文集團(746),同樣在7月6日公布全年業績,股價走勢重靚,噚日升4.85%,收1.08元,但成交就細好多,只得150萬元。
兩隻理文邊隻好?經紀黃話,雖然理文集團一向派息比率唔錯,但中期盈利有多少倒退,睇唔到今次公布全年業績會有太大驚喜,只算係穩穩陣陣;反而理文造紙較進取,公司致力大搞,不斷擴大市場份額,增長潛力唔錯,所以佢傾向睇好後者。
慕容小初