鄧麗欣（Stephy）、方力申、蘇永康、楊愛瑾（Miki）同梁漢文等一班金牌大風藝人，噚日到尖沙嘴力撐雷頌德（Mark）嘅好友開設嘅二手衫店，當中以阿Mark嘅服飾最多，佢話因為自己就嚟40歲，屋企嗰啲五顏六色嘅衫唔會再着，所以先一次過拎晒嚟賣。

康仔勒戒影響簽證

Stephy就準備咗三大袋服飾嚟支持，佢話到時會將收入做善事，不過佢每個月都會瘋狂購物，每次仲會花費成五位數字，認真誇張。至於Stephy嘅緋聞男友方力申原來因為鼻敏感，所以仍未有時間整理衣物，佢話：「我一執就會係咁打噴嚏，所以要等媽咪返嚟先同我執，我會拎泳褲出嚟，因為屋企好多泳褲，同底褲一樣咁多，要乜size都有，有大有細，同埋未剪牌。」
至於一向愛買名牌服裝嘅蘇永康亦坦言要支持阿Mark嘅好友，所以一定會將啲名牌二手衫捐出嚟造福人群，佢稍後會起程到三藩市，佢話當年因為台灣勒戒事件，搞到佢有一年時間辦唔到美國簽證，後尾佢都成功到美國登台做騷，不過今次去美國就係同女友去旅行。