今次反送中遊行，連續兩次有逾百萬人上街，而且相隔只有一星期，不少政界及民主派人士對季陶說，不少內地中間人均對他們說，那兩次遊行令北京措手不及；因為自港府提出送中惡法開始，北京收到來自港府、西環及建制派訊息，均是反送中「搞唔起」。

即使之後有逾10萬市民上街反惡法，仍有港府最高層向北京揚言是「小菜一碟」，完全不用擔心，「北京現在就想知，究竟真係形勢轉得咁急，定有人欺上瞞下」。

中間人收風：港府係咪冇做嘢

多名政界中人稱，那些內地中間人來港收風，其中一個焦點是，「究竟成個反送中入面，港府係咪一直冇做嘢，令成件事惡化」。其中一名民主派人士說，接觸他的內地中間人稱，北京一直收到訊息是，港人對反送中反對聲音不大，甚至獲不少市民支持。

「佢話北京得到來自港府、建制、甚至西環訊息，民意係支持送中惡法，即使商界有反對聲音，亦只係個別人士、以及對個別條文反對，政府修訂後已冇問題」，即使之後有逾10萬市民上街反惡法，北京再向港府了解是否可以順利通過惡法，「有港府極高層仲拍心口話，反對聲音只是小菜一碟，通過之後市民就知一切係反對派搞出來」。

當然這種欺上瞞下手法，結果令逾百萬港人上街反送中，外國政府更全力介入，這時北京才發現錯判形勢，「呢個時候先叫停，可惜已太遲，阻唔到200萬人再上街」；而這欺上瞞下之責，「北京等件事過後，一定查找不足，睇吓邊個要問責」。

季陶
周一、三、五刊出