吳業坤(坤哥)噚晚喺新城勁爆頒獎禮，以《凱旋門》贏得勁爆我撐歌曲，佢就表示好開心：「自己今年低調咗，緋聞少咗低調咗，但係都好開心總有獎可以得到，其實今年做幾首歌，都花費咗好多，又去咗英國，又去咗巴黎拍攝，所以呢首歌得到獎好開心、好感恩。」問到佢今年喺商台嘅「我最喜愛的男歌手」名單被踢出5強，坤哥就話：「其實都好正常，正如我咁講，我今年曝光亦都少咗，今次喺新城有獎攞都好開心，希望出年可以高調返。」

李幸倪(Gin Lee)就攞咗兩個獎，其中一個係同謝安琪、鄭欣宜攞勁爆女歌手，佢喺後台接受訪問就表示好感恩：「頭先出發嚟頒獎禮一路化妝，一路回顧自己工作，一路睇番舊相，嚟到時睇到4月，睇唔晒一年，證明今年真係做咗好多嘢，自己好感恩好忙。」Gin Lee提到嚟緊仍工作，3月會巡演，首先去馬來西亞：「希望可以帶埋父母一齊去，稍後會去國內五個城市，全部都好期待嘅事，同埋下年會做國語碟，相信都會係好忙嘅一年。」

另外，泳兒表示自己今年產量好少：「好開心仍然有獎，已準備好新一年派歌，覺得歌要重質不重量，同埋要等適合時間推出，嚟緊新歌都好大期望，其中有首新歌造型都會令大家嚇親，唔係性感，只係妝、外型耳目一新感覺。」問到佢公司咁多同事結婚，幾時到佢？佢話：「睇自己ready好未，我都未知自己ready好未，好難講，有時同居相處到，又未必結婚相處到，所以自己都未知。」問到係唔係要男友求婚，泳兒話：「都未知，等適當時機，自己都唔急。」

精選娛聞，喺晒《娛果》
http://fb.com/appledailyent